Fluguhnýtingar hjá Veiðiskólanum
Kennarar okkar í Veiðiskólanum eru meðal fremstu fluguhnýtara landsins. Við bjóðum upp á kennslu í öllum helstu þáttum fluguhnýtinga og leggjum áherslu á að kenna nemendum þá færni sem íslenskur hnýtari ætti að tileinka sér.
Námskeið fyrir alla hnýtara
frá byrjendum til lengra kominna
Byrjendanámskeið
Farið er yfir helstu tól og tæki og hnýttar nokkrar flugur sem kynna mismunandi aðferðir.
Framhaldsnámskeið
Hér er kafað dýpra í ákveðna flokka flugna, t.d.púpur, votflugur, þurrflugur, straumflugur, laxaflugur og klassískar laxaflugur.
Athugið
Allur búnaður og efni verða á staðnum svo ekki þarf að koma með neitt, þó getur verið gott fyrir þáttakendur að taka sinn eiginn búnað ef þau eiga hann til, til að venjast strax á það.
Einkakennsla og hópkennsla
Til viðbótar við auglýst námskeið bjóðum við upp á einkakennslu, sérsniðna að þínum þörfum, eða kennslu fyrir hópa, t.d. vinahópa, fyrirtæki eða veiðifélög.
Fluguhnýtingar á Íslandi
lifandi hefð og vaxandi ástríða
Fluguhnýtingar njóta sívaxandi vinsælda á Íslandi og má með sanni segja að á síðustu árum hafi orðið hálfgerð sprenging í áhuga og þátttöku. Íslenskir fluguhnýtarar eru þekktir fyrir frumleika, nákvæmni og hæfileika til að aðlaga flugur að íslenskum aðstæðum. Þetta hefur vakið athygli á alþjóðavettvangi og gert íslenskar flugur að eftirsóttum hönnunarverkum meðal veiðimanna víða um heim.
Fluguveiði er í dag stór hluti af íslenskri menningu, ferðamennsku og sjálfsmynd náttúrutengdrar þjóðar. Flugur sem notaðar eru hérlendis eru oft ólíkar þeim sem nágrannaþjóðir okkar nota – við hnýtum gjarnan minni flugur, leggjum áherslu á líflega hreyfingu í efnum og notum litabrigði sem henta hreinu og kristaltæru vatni landsins.
Sérstaða íslenskra vatnakerfa hefur þannig mótað bæði stíl og tækni íslenskra hnýtara. Silungaflugur eru hannaðar til að líkja eftir fjölbreyttu skordýralífi sem silungur nærir sig á. Þar sem fæðuvalið breytist eftir árstíðum þarf hnýtarinn að kunna vel til verka og hugsa í lausnum sem virka við mjög mismunandi aðstæður.